LE NEUFVIESME LIVRE
DE LA QUATRIESME PARTIE
D’ASTRÉE

Circéne reprit ses gands sans y prendre garde pour lors, mais le soir qu’elle fut pour se mettre au lict, sa fille de chambre qui s’en apperceut : Ma maistresse, luy dit-elle, qui vous a donné ces gands ? – Comment ? respondit Circéne, qui me les a donnez ? ne sont-ce pas ceux que j’avois ce matin ? – Je ne sçay, repli-[499/500]qua-t’elle n’ay jamais veu ces beaux vers. Et lors, les luy apportant, car elle estoit desja dans le lict : Voyez, continua-t’elle si je mens. Circéne alors, les lisant, et se souvenant, que je les avois eus quelque temps entre les mains, se douta bien que je les avois escrits, mais parce qu’elle ne vouloit point s’en fier à cette fille, qui despendoit entierement de Palinice et de Clorian, elle feignit de ne pouvoir deviner qui c’estoit, et pour monstrer combien elle s’en soucioit peu, elle donna les gands à Andronire : (c’estoit ainsi que cette fille se nommoit). – Je prie Dieu, ma maistresse, luy dit-elle, en la remerciant, que celuy qui a escrit à ce coup dans vos gands, prenne souvent plaisir d’en faire de mesme, et je vous assure que, si je le cognoissois, je l’en remercierois de bon cœur. – Tu ferois bien, respondit-elle en sousriant, car le present le merite. – Vous pensez, dit-elle, vous en mocquer, ce present tel qu’il est seroit bien cher, je m’en assure, à celuy qui est cause que vous me l’avez donné ; et si je les luy presentois de vostre part, je suis bien certaine qu’il m’en remercieroit de bon cœur. – Garde-toy, reprit Circéne incontinent, de faire cette sottise, car tu me ferois un extreme desplaisir. – Je n’ay garde, repliqua Andronire, de le faire, mais c’est d’autant que je ne sçay qui c’est. – Et si tu le sçavois, adjousta Circéne, par ta foy, le ferois-tu ? – N’en doutez pas, respondit-elle, car, outre, que j’ay pitié de ceux qui ayment bien, encore suis-je certaine que Clorian m’en sçauroit gré, et m’en remercieroit en temps et lieu. – Mais à propos de Clorian, reprit Circéne, garde-toy bien de les luy monstrer, si tu veux que nous vivions en paix avec luy et avec Palinice. – Et dequoy vous souciez-vous, respondit-elle, si vous ne sçavez qui c’est ? – II m’importe, repliqua Circéne, je ne veux point qu’il les voye.
Et alors, feignant de n’avoir pas bien leu ce qui y estoit escrit : Montre-les moy, Andronire, dit-elle, que je relise ce qu’il y a. Et elle sans y penser, les luy ayant rendus : Or va te coucher, dit Circéne, je te recognois pour si folle que je ne veux pas que tu les ayes. – Ah ! ma maistresse, s’escria-t’elle incontinent, rendez-moy donc les remerciements que je vous ay faits. – S’il ne tient qu’à cela, luy dit Circéne, que tu ne sois bien contente, je te les rends de bon cœur, et ceux encore que tu me feras de gands tous, neufs, que j’ayme mieux te donner. Et lors, se faisant apporter une petite layette où elle en avoit quantité, elle luy en donna une paire pour la contenter : Ma maistresse, luy dit Andronire en la [500/501] remerciant, vous m’avez appris un moyen pour n’avoir jamais plus faute de gands. – Et lequel ? respondit Circéne. – Lors que je verray, dit-elle, que ceux-cy seront usez, j’iray prier quelqu’un d’y escrire, comme dans les vostres, et vous m’en donnerez de tous neufs pour les avoir. – Tu as raison, adjousta-t’elle, mais cependant laisse-moy dormir.
Or Circéne cognut bien que j’estois le secretaire de ces vers, et quoy qu’elle n’eust aucune pensée qui fust à mon avantage, si ne vouloit-elle que Clorian les veist, et pour en oster le moyen à cette fille, elle ayma mieux les garder ; et toutesfois il lui fut impossible d’éviter ce que le Ciel en avoit ordonné, ainsi que vous pourrez entendre. Cependant ce petit artifice ne me fut pas du tout inutile, parce que Circéne se souvenant des paroles que je luy avois dites, et se representant le respect avec lequel je la servois, par la lecture de ces vers s’asseura mieux encore qu’il estoit vray que je l’aymois, et quoy qu’elle fust grandement engagée avec Clorian, si est-ce qu’elle ne pouvoit rejetter cette affection, qui luy estoit un grand tesmoignage de son merite. Apres avoir donc quelque temps consulté en elle-mesme si elle me devoit conserver en cette humeur, ou bien me donner sujet de la quitter, en fin elle creut que c’estoit son advantage de laisser libre le cours de cette nouvelle affection, ne luy semblant pas qu’elle devinst jamais telle qu’elle ne la pust bien arrester quand il luy plairoit.
Quelques jours apres elle vint voir ma sœur, et de fortune je n’y estois point, ayant pour lors accompagné Amilcar en la maison de Palinice. Et se retirant à part elle luy monstra les gands où j’avois escrit ce peu de paroles. Florice en recognut incontinent l’escriture, mais faisant semblant de penser que ce fust de Clorian : Et quoy, luy dit-elle, cette amour dure-t’elle encore ? – Comment ? respondit Circéne, si cette amour dure, mais de quelle amour voulez-vous parler ? Il faut plustost dire si elle est commencée. – Voire tout le monde ne sçait pas que Clorian vous ayme ? – Je le croy, reprit Circéne, et avec regret, je le croy que chacun voit la folie de Clorian. Mais cecy n’a rien de commun avec Clorian, et prenez bien garde si vous ne cognoissez point cette lettre. Alors reprenant les gands tout à coup, elle s’escria : Ah ! Circéne, si fay, je la cognoy, elle est d’une personne qui m’est proche et à qui j’ay bien représenté desja plus d’une fois que ce qu’il entreprenoit estoit un dessein duquel il n’auroit jamais de contentement, et qu’il feroit mieux de s’en retirer. – Vraye-[501/502]ment ! luy dit froidement Circéne, hé ! ma belle dame, quelle offence vous ay-je faite que vous me vueillez procurer tant de mal ? – Asseurez-vous, Circéne, respondit Florice, que ce n’a jamais esté mon intention de vous desplaire, mais bien de ne voir Alcandre en une entreprise, de laquelle il n’aura jamais de satisfaction. – Et comment pouvez-vous sçavoir, repliqua Circéne, les choses futures ? – Je ne les sçay pas avec asseurance, reprit Florice, mais je les puis bien prévoir par conjecture ; et vous-mesme qui y avez interest, si l'’on vous en prenoit à serment, ne diriez-vous pas comme moy ? – Je vous diray sainement, reprit alors Circéne, il est vray que Clorian a une folie en sa teste qui vous peut faire parler de cette sorte, mais il est encore plus vray que si l’humeur où je suis me demeure, il ne parviendra pas à ce qu’il pense. Ce n’est pas qu’avec ces paroles je vueille engager davantage Alcandre au dessein qu’il fait paroistre d’avoir ; car outre que je n’en vaux pas la peine, encore suis-je fort peu en volonté d’estre aymée, mais je le dis pour la verité, et que je suis bien marrie que l’indiscretion de Clorian me soit si desadvantageuse, sans que j’aye autre part en sa faute que d’en souffrir par contrainte l’importunité. – Puis que vous m’en parlez, respondit ma sœur, avec tant de confiance, je vous diray, ma belle fille, que veritablement la recherche que Clorian fait de vous ne vous est point desadvantageuse, sinon en tant qu’il fait paroistre en public d’avoir une si grande, authorité sur vous, qu’il semble qu’il en doit bien avoir une plus grande en particulier. Si cela vous peut nuire, je le laisse à vostre jugement. Tant y a que je pense que vous feriez beaucoup pour vous, si peu à peu vous ostiez de ses mains cette absolue authorité, d’autant que par ce moyen vous feriez voir à chacun qu’il n’y a point de vostre faute, et que la pensée de ceux qui ne font mestier que de juger des actions d’autruy, s’est grandement deceue en l’indiscrétion de cet homme. – O Florice ! s’escria Circéne, que ce conseil est aisé à donner et difficile à executer ! Si vous sçaviez quelle humeur est celle de Palinice ! une autre fois que nous aurons plus de loisir, je vous en veux entretenir bien au long. Cependant, continua-t’elle en sousriant, ne croyez pas que je vueille qu’Alcandre prenne la peine de m’aimer ; car c’est la verité que vous m’avez obligée quand vous l’en avez diverty, et que vous augmenterez encore cette obligation quand vous continuerez, quoy que je sçache bien que vous n’y aurez pas grand’peine, puis que je suis assez assurée qu’il ne fait que se mocquer. [502/503] Et à ces dernieres paroles, ma sœur prit garde qu’elle rougissoit un peu, qui luy fit juger que ce qu’elle en disoit n’estoit pas peut-estre selon son desir ; toutesfois, feignant de son costé de le croire, ainsi qu’elle l’avoit dit, elle luy respondit : Soyez seure, Circéne, que tant pour vostre interest que pour celuy de mon frere, je voudrois vous pouvoir descharger de cette importunité, mais je ne l’espere pas.
A ce mot, elles se separerent, parce qu’à mesme temps Amilcar et moy qui conduisions Palinice, entrasmes où elles estoient, et peu apres Cerinte et Sileine. Quant à moy, apres avoir salué la compagnie, je m’approchay de Circéne. Cerinte entreprit Florice, et Sileine et Amilcar s’assirent aupres de Palinice. J’advoue que pour ce coup je ne fus pas fort attentif aux discours du reste de la compagnie, estant si aise d’avoir rencontré seule celle que je cherchois qu’il me sembloit que le Ciel m’avoit grandement favorisé. Et je dis seule, encore que toute cette bonne compagnie y fut, parce que je l’estimois telle, puis que Clorian n’y estoit pas, d’autant que veritablement, quand il y estoit, mal-aisément la pouvoit-on entretenir. Luy voyant donc les mesmes gands où j’avois escrit, je luy dis : Je jure, belle Circéne, que tout ce qui est dans vos gands est plein de verité. – Je n’en doute point, me dit-elle, car il est vray que mes mains qui y sont, sont de vrayes mains, – Vos mains, repliquay-je, ne doivent pas seulement avoir le nom de vrayes, mais aussi des plus belles du monde. Mais il y a bien encore quelque chose dans vos gands que vous ne dites pas.
Elle qui feignoit de n’entendre ce que je voulois dire : Ily a, adjousta-t’elle, quelques bagues que je porte aux doigts, qui sont aussi de vrayes. – II y a encore, repris-je, quelqu’autre chose. – Et que pourroit-il y avoir, dit-elle, faisant l’estonnée ; quant à moy, je n’y vois ny sens autre chose. – Ah ! Circéne, luy respondis-je alors en souspirant, c’est là un grand tesmoignage de mon peu de bon-heur, que mon cœur estant entre vos mains, vous ne le sentiez point, et que vous ne vueillez pas mesme voir l’escriture qui vous touche. Et alors en sousriatnt : Comment voulez-vous, repliqua-t’elle, que je puisse sentir vostre cœur, s’il n’y est pas ? Et lors sortant la main du gand : Voyez s’il y a point icy de cœur. – Mais voyez, repris-je incontinent, s’il est possible qu’une si belle main y soit sans qu’il y en ait une infinité. Et luy prenant le gand, et luy monstrant l’escriture : Et voyez si je ne dis pas vray, puis que je voy là ce que le mien y a escrit. [503/504]
Elle alors, feignant de ne l’avoir encore point veu : Vrayment ! Alcandre, me dit-elle vous estes bien hardy d’avoir escrit dans mes gands : pensez-vous que j’y prenne plaisir ? Et lors, prenant des ciseaux, elle fit semblant de les vouloir effacer, mais mettant la main au devant, je luy dis : Pardonnez à la grandeur de mon affection, la hardiesse dont vous m’accusez, et croyez, belle Circéne, que c’est en vain que vous voulez effacer ces paroles que j’ay escrittes, puis qu’elles sont tellement engravées dans le cœur que je vous ay donné, ou plustost que vous m’avez ravy, que le temps ny la mort mesme ne les effaceront jamais. – Alcandre, me dit-elle, je n’en veux ny le cœur ny les paroles, sçachant que l’un et l’autre sont peu veritables; mais quand ils seroient autrement, je ne veux point me charger de semblable marchandise. – J’advoue, luy respondis-je assez froidement, que cette marchandise ne valant gueres, et vous, l’estimant fort peu, vous avez raison de ne vous en vouloir pas charger, car il est vray qu’elle n’a point de cours, et que si une fois vous en estiez chargée, vous ne vous en deferiez jamais. – Ce n’est pas, repliqua-t’elle en sousriant, ce que je veux dire, car au contraire je sçay assez que vous valez beaucoup, et que l’estime que je fais de vous, est telle que je doibs. Et de plus que cette marchandise dont vous parlez, quand je l’aurois, ne demeureroit gueres entre mes mains, estant comme ces quintessences qui s’en vont toutes en fumée. Mais c’est en effet, Alcandre, que je ne m’entens point, pour parler franchement, ny à aymer, ny à estre aymée. – Je m’estonne, repris-je incontinent, que vous ne sçachiez point une chose que vous enseignez si bien. – Alcandre, adjousta-t’elle, avec un œil riant et me frappant doucement sur une main, vous estes un mocqueur, et asseurez-vous que je reçois bien de mesme tout ce que vous me dites. – Belle Circéne, luy respondis-je, si je ne suis véritablement vostre serviteur, je ne suis point Alcandre, et je veux que le Ciel me fasse cesser de vivre, lors que je cesseray de vous aimer.
Elle vouloit me respondre, et desja elle avoit la bouche, entr’ouverte, lors qu’elle retint tout à coup la parole, et changeant de visage et de façon envers moy, elle sembla estre devenue une autre personne. Ce changement m’estonna, mais tournant les yeux du costé de la porte, je vis entrer Clorian avec Lucindor.
Avez-vous point veu, gentil berger, de jeunes enfans qui sont encore soubs le fouet, lors qu’ils sont surpris en quelque faute, par celuy qui les gouverne ? Figurez-vous que Circéne et Florice [504/505] en firent de mesme quand Lucindor et Clorian les surprindrent, l’une aupres de moy, et l’autre auprés de Cerinte, et quoy que j’eusse de l’interest en toutes les deux, si ne me pus-je empescher d’en rire. Et pour monstrer ma discretion à Circéne, la voyant en quelque peine que Clorian me vist seul aupres d’elle, je fis semblant de l’aller recevoir, et Lucindor aussi, et leur faire l’honneur du logis. Florice en fit de mesme, et cela fut cause que chacun par compagnie se leva. Mais cela n’empescha pas que Clorian ne prist garde que Circéne parloit à moy, et que Lucindor ne vist aussi Florice avec Cerinte, si bien qu’à l’abord ils entrerent avec un visage severe et mécontent, de quoy estant tous deux en peine, mais Circéne beaucoup plus, elles firent ce qu’elles purent pour les remettre en bonne humeur.
Clorian ne sçavoit pas encore bien asseurément que j’aymasse Circéne, mais la doute où il en estoit, et l’humeur qu’il avoit de ne vouloir souffrir que personne parlast à ceste fille, luy faisoit faire ceste mine. J’advoue que ceste façon de Circéne me deplut, et qu’alors mesme je fis cent fois resolution de ne la plus aymer, mais aussi-tost que je tournois les yeux sur son visage, il falloit ceder à la force de sa beauté, et pliant les espaules, me plaindre en cela de ma mauvaise fortune, et de l’injustice du Ciel, qui ordonnoit que celle de qui j’estois esclave fust en telle servitude.
Enfin, le soir estant venu chacun se retira, mais Circéne me donna le bon soir avec une si grande froideur qu’il sembloit que je luy eusse fait quelque bien grande offence. Toutesfois, jugeant que c’estoit à cause de Clorian, je ne voulus pas mesme, selon ma coustume, l’accompagner en son logis. Et entrant dans mon jardin, apres m’estre quelque temps entretenu sur ceste pensée, je souspiray tels vers.

Quand je retournay au logis, Florice me raconta tous les discours qu’elle avoit eus avec Circéne et apres adjousta : Voulez-vous, mon frere, que je vous die ce que j’en pense, asseurez-vous qu’elle sera plus aysément distraite de l’amitié de Clorian, que, je [506/507] n’eusse pas creu. Et, pour dire la verité, il use d’un si grand empire sur elle, que je ne sçay comme elle l’a peu si longuement souffrir. – Ma sœur, luy respondis-je en sousriant, ce que vous trouvez estrange en autruy, comment le souffrez-vous en vous-mesme ? Croyez-moy que vous estes faites toutes d’une certaine façon, que, sans vous offencer, l’on vous peut mettre en quelque ordre de creatures qui ne fust ny des animaux raisonnables, ny des irraisonnables, mais en une tierce espece au milieu de ces deux. – Je vous asseure, Alcandre, me dit-elle, que vous nous obligez beaucoup de parler ainsi de nous, et quelles voudriez-vous que nous fussions, si nous n’estions celles que nous sommes ? – Voyez-vous, Florice, continuay-je, je vous jure que je dis vray, par dites-moy, je vous supplie, si Lucindor vous veut traiter comme Circéne l’est de Clorian, pourquoy, si vous le desapprouvez pour elle, l’approuvez-vous pour vous ? Et si Circéne s’ennuye de cette tyrannie, pourquoy elle-mesme va-t’elle renouant ses chaisnes avec des nœuds plus forts et plus serrez ? Hé ! ma sœur, croyez-moy, et vous et Circéne, et toutes les femmes du monde, vous estes toutes faites sur un mesme patron : vous voulez et ne voulez, vous ne voulez et vous voulez. – Que voulez-vous dire, mon frere, me dit-elle en sousriant, par ces paroles embrouillées ? – Je veux dire, respondis-je, que vous voulez estre maistresses, et vous vous plaisez à vous rendre esclaves ; et puis vous vous ennuyez de cette servitude, et toutesfois vous prenez plaisir d’y demeurer. Vous-mesme ne m’avez-vous pas dit que Lucindor ne peut souffrir que Cerinte parle à vous ? et qu’une semblable jalousie a esté la plus grande peine que vous ayez eue avec Teombre ? Si cela est, pourquoy vous y sousmettez-vous, et que ne prenez-vous sur luy l’authorité qu’il usurpe sur vous ? Vous trouvez estrange que Circéne soit de cette sorte tirannisée de Clorian ? et je le trouve plus estrange de vous, car il y a quelque raison pour elle : la nourriture qu’elle a eue en sa maison, l’authorité que Palinice a tousjours prise sur elle, son peu d’experience, et plusieurs autres considerations qui pour vous n’ont point de lieu.... – Mais qui vous a dit, interrompit Florice, que je crains Lucindor ? – Mes yeux, repliquay-je, et vos actions. Si vous eussiez eu un miroir lors qu’il est entré avec Clorian, je ne vous, croy pas tant aveugle que Vous ne l’eussiez aussi bien veu que chacun s’en pouvoit prendre garde, et puis vous m’allez dire que Circéne s’ennuye de l’authorité que Clorian prend sur elle, et qu’il [507/508] seroit aisé de l’en distraire ! Hé ! ma sœur, que ces espérances sont mal fondées, puis qu’elles le sont sur la resolution qu’une femme doit, faire. Souvenez-vous que, si c’estoit d’une chose qui fust à vostre desadvantage, ou bien pour faire, contre raison, desesperer une personne qui fust toute à vous, ô qu’aysément vous en prendriez toutes la resolution, mais en ce qui est raisonnable ou à vostre advantage, ô que tard, ou jamais vous y resoudriez-vous ! Je continuay de ceste sorte ces reproches à Florice, qui m’ayant quelque temps donné audience, en fin s’approchant de moy, et me prenant par le bras : Mais, dites-moy, Alcandre, interrompit-elle, d’où venez-vous, que vous estes en si mauvaise humeur ? Et luy ayant respondu que je venois de me promener dans le jardin. – Pour certain, repliqua-t’elle, il faut que vous y ayez mangé de quelque herbe bien amere. – J’y ay cueilly, luy dis-je, des pensées et des soucis si amers, qu’il n’y a atsinthe qui les vaille. – Je m’en doutois bien, adjousta-t’elle, puisque vos paroles sont encore toutes pleines d’amertume. Mais puisque vous nous estimez tant inconsiderées, dites-moy, je vous supplie, vous qui estes si sage, voulez-vous que je rompe avec Lucindor ? Advisez bien quel conseil, vous me donnerez, car je vous promets de le suivre ; il est vray que je diray que c’est vous qui me l’avez conseillé, m’assurant que vous ne voulez pas me dire chose de laquelle vous ne vouliez estre nommé l’autheur. – Je vous assure, luy respondis-je, ma sœur, que vous estes bien gracieuse : parce que Lucindor est frere de Circéne, vous voulez à mes despens ravoir vostre liberté ? – Ne voyez-vous, reprit incontinent Florice, que, si les femmes ont peu de resolution, les hommes sont d’autant plus attachez à leur interest ? Hé ! Alcandre, qu’il est aysé de voir le festu dans l’œil de son voisin et qu’il est difficile d’apercevoir la poutre qui nous creve les nostres ! Si je souffre quelque chose de Lucindor, vous en devez estre bien ayse, car estant frere de Circéne, nous la tiendrons tous jours en quelque sorte de devoir envers vous. – Voulez-vous, ma sœur, luy dis-je, que je vous parle franchement ? Je ne suis pas marry de Lucindor, car encore il ne sort pas entierement hors des termes de la raison, mais il m’est impossible de supporter les impertinences de Clorian. – Mon frere, mon amy, me respondit-elle incontinent, je voy bien à ce coup que vostre bouche parle selon vostre cœur, mais mettez-vous en repos, et vous asseurez que si vous voulez me croire, [508/509] nous ferons quelque chose qui vous contentera. – Et que voudriez-vous, repris-je incontinent, que je fisse ? – O Dieu ! respondit-elle en sousriant, que nous avons bien changé de personnage, puis que c’est à moy à vous donner conseil ! Or bien, mon frere, pour ce coup recevez-le, et si vous vous en trouvez mal, ne me croyez jamais plus. Quelque mine que Circéne vous fasse, continuez de la servir, mais souvenez-vous de cacher vostre affection à tout le monde, sinon à elle, et laissez faire le reste à vostre mérite, à l’impertinence de Clorian, à l’humeur de Circéne et à mon assistance. Car si vous vous descouvrez, Clorian et Palinice tourmenteront de sorte cette fille, qu’elle voudroit que vous fussiez hors du monde ; et au contraire, si vous vous cachez bien à eux, vous verrez que cette discrétion luy plaira de façon que l’insuffisance de Clorian luy sera au double insupportable. Et asseurez-vous que, pour peu qu’elle s’esbranle, je ne laisseray pas perdre une seule occasion qui vous puisse rapporter de l’utilité. – J’advoue, luy respondis-je, que je recognois bien par vos discours qu’il faut croire chacun en son mestier. Aymer et dissimuler, c’est le mestier duquel presque toutes les femmes se meslent : voilà pourquoy je veux suivre vostre avis sans y faillir d’un poinct. – Vrayment, Alcandre, me dit-elle en me frappant sur l’espaule, j’employe bien mon temps à vous conseiller avec tant d’affection, puis que pour remerciement vous me dites des injures.
Tels furent nos discours desquels je ne conceus pas de petites esperances, et me semblant que l’avis de Florice n’estoit pas à rejetter, je me resolus à le suivre le mieux qu’il me seroit possible. Et sur le sujet de la contrainte dont il me falloit user, je me souviens que je fis ces vers.

Vous sçavez, Hylas, que la passion a cela de propre d’entrainer avec violence les puissances de l’ame qu’elle possede. Figurez-ous qu’il m’en advint autant, car, quelque dessein que j’eusse fait, mon affection, sans que j’y prisse garde, m’emporta quelques jours apres à faire des actions qui ne donnerent que trop de cognois-[510/511]sance de ce que je voulois tenir caché, si bien que Palinice s’en apperceut, faisant en cela bien paroistre qu’il est vray que malaisément l’artifice peut cacher quelque chose à ceux qui sont de mesme mestier. Et parce qu’elle sçavoit assez combien Clorian supportoit cette nouvelle amour avec impatience, et qu’elle aimoit grandement ce frere, elle tira un jour à part Circéne, et au commencement luy representa combien une fille estoit peu advisée de laisser une ferme et assurée affection pour une nouvelle, combien la pluspart de ceux qui les recherchent le font plustost par humeur que par amour, et quelques fois seulement pour essayer si elles peuvent estre gaignées aisément, afin d’en faire apres des contes et s’en mocquer, ne se soucians gueres de ruiner de reputation celles qu’ils font semblant d’aymer, pourveu que cela serve à leur vanité ; combien il est difficile d’en trouver d’autre humeur, et quel danger courent celles qui s’y fient devant que les avoir bien esprouvez.
Et puis elle continua : Or, ma chere fille, je vous represente tout ce que je viens de dire, pour vous advertir d’une chose, à laquelle peut-estre vous ne prenez pas garde. J’ai recognu qu’Alcandre depuis son retour fait cas de vous, et, qu’il vous veut faire accroire qu’il vous ayme : c’est un jeune homme qui n’a encore point vendu de sa marchandise, il vient de loing, il ne fait que l’estaler en vente. Souvenez-vous, Circéne, qu’il ne faut pas croire tout ce qu’il dira, et que, pour peu que vous luy offriez de ce qu’il vous presentera, il vous prendra sans doute au mot. Nous ne sçavons point encore de quelle humeur il est, je serois marrie que nous l’apprissions à vos despens, et croyez que ce que je vous en dis, n’est que pour vostre seul interest, car pour ce qui touche l’affection que mon frere vous porte, je m’asseure qu’il est assez honneste homme pour vous obliger à luy vouloir du bien, quoy que je ne doute pas que s’il s’en prenoit garde, il ne le supportast avec beaucoup de peine. Et peut estre ne sçay-je à quoy un tel desplaisir, le feroit resoudre ! Et Dieu sçait quel ennuy seroit le mien, de voir ce divorce entre nous ! je dis entre-nous, parce qu’il me seroit impossible de ne point participer à l’ennuy que vous en recevriez tous deux. Je voy bien que de vostre costé vous ne contribuez rien en çecy, sinon une certaine complaisance qui est ordinaire à toutes celles de vostre aage, parce qu’il leur semble que d’estre servies de plusieurs, c’est quelque chose de fort estimable. Mais, ma fille, perdez cette opinion, je vous supplie, et [511/512] croyez qu’il n’y a rien qui rende plus mesprisable, ny qui descrie plus une jeune personne que de la voir suivie et poursuivie de toutes sortes de gens, parce que les choses communes sont peu estimées, et que les personnes de merite ne veulent point marcher en foule, et qu’en fin, outre tant d’autres raisons, malaisément se peut-on imaginer que tant de jeunes esprits se puissent arrester aupres d’un mesme sujet, s’ils n’y estoient retenus par des faveurs ou par des esperances. Recevez, Circéne, de bonne part l’avis que je vous en donne, et en faites vostre profit, comme sage et prudente que vous estes.
Circéne demeura fort attentive au discours de Palinice, et quoy qu’elle jugeast bien que tout que ce qu’elle en disoit estoit seulement à l’occasion de son frere, si le receut-elle comme elle devoit avec un visage, sans se troubler ny sans seulement froncer le sourcil, si bien qu’apres l’en avoir remerciée, elle la supplia de luy vouloir tousjours continuer l’amitié qu’en cela elle luy faisoit paroistre : que quant à elle, elle ne pouvoit més de ce que j’avois fait, et qu’elle tascheroit avec discretion de m’en destourner le dessein que Palinice luy disoit, et l’estimoit et l’honneroit tant à son occasion, qu’elle ne voudroit, pour quoy que ce fust, luy donner sujet de mauvaise satisfaction.
Tels furent les premiers discours qu’elles eurent ensemble pour mon sujet. Et voyez, je vous supplie, combien il se faut conduire prudemment en semblables accidens. Il est vray que l’avis que Palinice donna à Circéne fut bien cause qu’elle usa depuis plus froidement envers moy, mais il est bien certain aussi que deslors elle traita avec moy comme avec son serviteur. Je veux dire qu’elle se persuada de sorte que je l’aimois, qu’elle n’en pust pas douté, pour quoy que tout le monde luy en eust pu dire au contraire. Et par ainsi les discours avec lesquels Palinice me pensoit faire plus de mal, profiterent davantage à mon dessein que je n’eusse fait de long-temps par toutes mes recherches. Ma sœur qui vid ce changement, et que Circéne ne m’osoit pesque plus nommer sans rougir, que quand j’entrois où elle estoit, elle baissoit les yeux, ou les tournoit d’un autre costé, que, lors que je m’approchois d’elle, si elle estoit esloignée de la troupe, incontinent elle changeoit de place, et s’en alloit parmy les autres, si je luy presentois des fleurs ou des fruicts comme je soulois, elle les refusoit, et [512/513] ne faisoit pas semblant de les regarder ; bref, considerant combien elle sembloit estre mal satisfaite de moy, un jour que nous estions seuls dans nostre logis, elle ne se pust empescher de m’en parler, me representant ce mespris tant insupportables à un homme de courage. Que si des paroles eussent esté capables de me faire changer d’opinion, sans doute celles de Florice estoient suffisantes à me divertir de l’affection que je portois à Circéne ; mais le mal estoit trop enraciné ou, pour mieux dire, la flesche que j’avois dans le cœur y avoit esté poussée par une main trop forte, pour en pouvoir estre arrachée sans la mort.
Et elle le recognut bien à la responce que je luy fis, car lors qu’elle se travailloit le plus à me representer le tort que cette belle fille me faisoit de me traiter de cette sorte, que chacun demeuroit estonné de me voir si opiniastre, ou pour mieux dire insensible ; qu’en toute autre occasion j’avois fait paroistre et du courage, et du jugement, et qu’en celle-cy il sembloit que j’avois oublié ce que j’estois, et bref, apres m’avoir remis devant les yeux, et qui j’estois, et qui elle estoit, et que nostre alliance luy estoit pour le moins aussi honnorable et advantageuse que celle de Clorian, ny de quelqu’autre qui la pust rechercher. – Ma sœur, m’amie, luy dis-je en sourisant, vous me faites souvenir de ces mires qui voyans une playe, pensent avoir fait assez de declarer quels nerfs, ou quelles ateres en demeurent offencées, de faire voir combien elle est dangereuse et mortelle, et les grandes incommoditez que le patient en ressent, sans se soucier de mettre la main aux remedes qui luy peuvent estre salutaires. Helas ! ma sœur, je ne sçay que trop tout ce que vous me dites ! Je voy bien que Circéne ne m’aime point, je cognois assez que mon service ne luy est point agreable, et son ame. Mais à quoy me sert, ny que je le recognoisse, ny que vous me le representiez, puis qu’en effet ce n’est que me faire recognoistre et me remettre devant les yeux la grandeur de ma blessure. Il faut, si vous avez pitié de mon mal, que vous ne perdiez plus le temps à me dire ce que je ne sçay que trop, mais, au contraire, que vous l’employiez aux remedes qui me sont necessaires ; autrement je vous en asseure, ma sœur, que vostre pitié, au lieu de m’estre utile, sera cause de la fin de ma vie. Car, de penser que ces considerations puissent me divertir de l’affection que je porte à cette fille, c’est se tromper infiniment, puis que je suis de telle sorte à elle, que non seulement elle peut libre-[513/514]ment user des cruautez contre moy (que vous nommez indignitez) mais encore de toutes celles qu’elle voudra, sans que jamais mon cœur en murmure, tant s’en faut qu’il s’en plaigne, ou qu’elles luy puissent faire changer de dessein.
Je vis que Florice, m’oyant tenir ce langage, changea de couleur, et demeura ravie d’estonnement, et apres m’avoir quelque temps consideré sans me dire mot, enfin elle reprit ainsi la parole : J’avoue, mon frere, que jamais personne n’a sceu aymer que vous, si c’est toutesfois aimer, que se donner entierement à quelqu’un, mais il faut que je die que vostre affection meritoit aussi de rencontrer quelque correspondance, si pour le moins le Ciel ne vouloit pas vous rendre le plus mal-heureux de ceux qui sçavent aymer. – Et moy, ma sœur, luy respondis-je, je signeray de mon sang tout ce que vous me dites. Mais à quoy me sert tout cela, et en quoy est-ce que cette cognoissance allege la moindre partie de mon mal ? – Voulez-vous, me dit-elle, que j’esprouve les derniers remedes que je gardois pour la guerison de vostre blessure, lors que j’eusse veu tous les autres inutiles ? – Ma sinon, luy respondis-je, à quoy peuvent servir les retardemens, sinon à me faire perdre la vie ? – Or, mon frere, adjousta-t’elle, resjouissez-vous donc, et vous asseurez que je m’en vay faire tous mes efforts avec Lucindor, et que s’il n’obtient rien de sa sœur pour vostre contentement, il peut bien n’attendre jamais de moy une bonne parole. Vous, cependant, de vostre costé, ne laissez d’y faire tout ce que vous pourrez ; car les diverses batteries sont tousjours cause de faire plus tost rendre la forteresse.
Ce fut avec ceste resolution que nous nous separasmes : elle, cherchant l’occasion de parler à Lucindor, et moy, pensant et repensant à ce que je pouvois faire pour gagner ceste cruelle fille, Je vous ay desja dit qu’il y avoit un jardin en mon logis où bien souvent j’allois entretenir mes fantaisies ; à ce coup, comme de coustume, je m’y en allay, si avant en ceste pensée que je ne pris pas garde que Belisard se promenoit tout seul sous une allée fort couverte. Ce Belisard, c’est ce jeune homme qui dort dans ce lict proche de nous, et qui nous fut donné pour avoir soin de nous, lors que nostre pere nous faisoit suivre les escolles des Romains. Le long temps qu’il avoit vescu avec nous, et nostre ordinaire conversation luy avoient fait naistre une si grande affection envers moy, que veritablement il m’aymoit tout ce qu’il pouvoit aymer : et la cognoissance que j’en avois, outre plusieurs bonnes qualitez [514/515] qui le pouvoient rendre aimable, avoit esté cause que je l’avois tousjours tenu fort cher, et que je me fiois de telle sorte en luy que je n’avois rien qui luy fust caché. Ceste fois seulement je ne luy avois point parlé de l’affection que j’avois pour Circéne, sans pouvoir en trouver la raison, sinon que l’occasion ne s’en estoit point presentée.
Or ce jeune homme estoit, comme je vous ay dit, devant que moy dans ce jardin, sans que je m’en prisse garde, et de fortune, je m’allay mettre dans une allée qui n’estoit separée de la sienne que d’une palissade de lauriers, qui estoit assez espaisse. Luy qui m’apperceut venir, le chapeau enfoncé et les yeux contre terre, marchat à grands pas, cognut bien d’abord que j’avois quelque profonde pensée qui m’embarrassoit l’esprit. Et parce que ce n’estoit pas ma coustume de luy cacher quelque chose de semblable, il ne sçavoit que penser. Cela fut cause que se joignant le plus qu’il luy fut possible contre la palissade, il essayoit d’ouyr quelques paroles qu’il luy sembloit que je proferois assez bas, mais il ne demeura pas fort long temps en ceste peine, car ne pensant pas estre escouté de personne, je relevay bien tost la voix et lors il put aisément apprendre qu’amour estoit la cause de mon mal. Et parce qu’il m’ouyt plusieurs fois repliquer ces paroles assez haut : Mais puisque, quoy que j’y aye sceu faire, rien ne m’a pu pronter à vaincre le courage de ceste cruelle, qui sera celuy qui pourra m’y ayder, et de qui dois-je esperer quelque secours ? J’ouys qu’il me respondit fort haut : De Belisard.
Si ceste voix me surprit,vous le pouvez juger, Hylas, puisque je pensois estre seul en ce lieu. J’arrestay mes pas, je regarday autour de moy pour voir s’il y avoit quelqu’un, et n’y apercevant personne, j’advoue que je commençois de me persuader que c’estoit quelque demon qui m’avoit fait ceste responce, lors que ce jeune homme, faisant le tour de la palissade, s’en vint vers moy, repliquant plusieurs fois : De Belisard, de Belisard. C’est, adjousta-t’il, du fidele Belisard que vous devez attendre toute sorte de service. Et comment, seigneur, continua-t’il, quand il fut un peu plus prés, vous estes en peine, et vous vous cachez à moy ? Avez-vous perdu le souvenir de mon affection et de ma fidelité ? – Amy Belisard, luy respondis-je, tu ne te dois offencer que je t’aye teu une chose que, si j’eusse cachée à moy-mesme, me semblant que, comme le feu esventé jette de plus grandes flames, et que bien souvent, s’il ne prend air, il s’estouffe [516] de soy-mesme, aussi celuy-cy en feroit autant, et que par ce moyen je demeureois libre comme je soulois estre. – Ah ! seigneur, me respondit-il, que je voy bien que voicy la premiere fois que vous avez esté atteint de ce mal puisque vous jugez qu’il se puisse esteindre de soy-mesme ! Sçachez, seigneur, que depuis qu’un cœur en est touché, il n’en peut jamais guerir que par un mespris si extréme qu’il oste toute esperance, ou par la possession de la chose qui nous fait le mal. Et en voicy la raison : il n’ya rien qui naturellement puisse vivre sans avoir quelque nourriture ; or les faveurs sont les nourritures d’Amour. Lors qu’un amant est privé de ces faveurs, ou pour le moins de l’espoir de ces faveurs, il faut que comme le flambeau s’amortit quand il n’y a plus de cire de mesme s’esteigne aussi celuy d’amour dans le cœur qui n’a rien de quoy le nourrir. Mais aussi, comme la surabondance de la cire esteint la flamme qu’avec sa mediocrité elle nourrit, je dis que la possession de la chose aymée estouffe l’amour par la surabondance des faveurs qu’en semblables occasion on reçoit. – Si tu ne sais pas mieux donner remede à mon mal ; luy dis-je, que tu en sçais discourir, ô Belisard ! j’ay grand peur que j’en seray longuement malade, car j’espreuve que l’une de ces choses que tu dis le faire mourir, ne sert qu’à le rendre plus grand et douloureux. Et je ne puis m’imaginer que la possession d’un bien puisse faire hayr le bien, de sorte que la raison d’un costé et l’experience de l’autre me font cognoistre que tu n’es pas grand docteur, ny grand mire.
– Il n’y a rien, me dit-il, seigneur, qui nuise tant à la guerison d’un malade, que d’avoir mauvaise opinion de celuy qui entreprend sa cure ; car nous avons veu bien souvent l’imagination faire des effect incroyables. C’est pourquoy vous ne devez si tost faire mauvaise jugement de ma capacité, que vous n’ayez bien consideré mes raisons. J’ay dit que les estrémes mespris, ou la surabondance des faveurs, peuvent sans plus faire esteindre l’amour. Et n’est-il pas vray que l’amour est un desir, et que l’on ne desire jamais ce que l’on possede ? Si, possedant, il n’y a plus de desir, il s’ensuit qu’il n’y a point d’amour. – En amour, respondis-je, il y a un abysme de douceurs , de delices, et il est impossible de les avoir jamais toutes, ny seulement en avoir jamais tant qu’il ne nous en defaille encore beaucoup plus grand nombre que nous n’en possedons ; outre que l’appetit, pour estre satisfait, ne s’esteint pas, au contraire, le souvenir du bien possedé en [516/517] rend le desir plus violent. Et ainsi par la mesme raison, amour estant un desir, et le desir s’esveillant plus ardent que la cognoissance du bien possedé, il s’ensuit que ce que tu dis qui le tue, rend au contraire, cet amour, plus fort et plus violent. – Il faut, repliqua-t’il, que cet amour, s’il est ainsi que vous le dites, soit gourmand à outrance, si rien ne le peut souler. Mais, seigneur, que direz-vous du mepris ? n’est-il vray qu’en un courage genereux, c’est un poison contre lequel amour ne peut resister ? car si le froid esteint le chaud, et si chasque contraire est la ruine de son contraire, vous ne nierez pas pour le moins que la hayne ne soit contraire à l’amour, et qu’elle ne le fasse mourir. – Toutes les choses qui sont en l’univers, repris-je, sont conservées par leurs contraires, et s’il n’y avoit point de contrarieté, tout ne seroit qu’une chose, et ainsi le monde finiroit, ou pour le moins ne seroit plus monde. – Il est vray, repliqua-t’il, mais c’est lors que ces contraires sont tellement esgaux en puissance, que l’un ne peut surmonter l’autre. Mais quand est-ce qu’une amour ne sera point estouffée par un extréme mespris ? – Selon ta raison, luy dis-je froidement, ce sera lors que l’amour sera aussi extréme que le mespris. Mais, Belisard, à quoy perdons-nous le temps en ceste dispute hors de saison ? Que m’importe que ce que tu dis soit ou ne soit pas vray, puis qu’en effet j’epreuve que les défaveurs, ny les mespris n’ont point fait en moy l’effect que tu dis ?
– Seigneur, me respondit-il, vous verrez que peut-estre vostre experience n’est pas telle que vous la dites. Dites-moy, je vous supplie, quel tesmoignage avez-vous d’estre mesprisé ? – O Belisard ! m’escria-je, j’en ay tant et de si grands qu’il faudroit bien estre incredule pour ne les advouer pas. Et afin que tu en puisses mieux juger, car aussi bien ne te veux-je rien celer, sçache que j’ayme esperduement Circéne. – Celle là, adjousta-t-il, que Clorian a si long temps recherchée ? – C’est elle-mesme, repliquay-je, et je t’asseure que, depuis que cette affection est née et que je la luy ay descouverte, elle est tousjours allé augmentant en ses cruautez. – Seigneur, me dit-il alors froidement, ne recevez point à importunité si je suis un peu curieux. Dites-moy, je vous supplie, devant que vous luy eussiez fait cognoistre que vous l’aymiez, traitoit-elle avec vous de cette sorte ? – Nullement, respondis-je, au contraire ce n’estoit que douces paroles, et qu’honnestes faveurs que celles que je recevois d’elle. – Et lors, adjous-[517/518]ta-t’il, que vous luy dites que vous l’aymiez, usa-t’elle de mespris ou de colere ? – Ny de l’un ny de l’autre,luy dis-je, mais ç’a esté quelque temps apres qu’elle a commencé de vivre ainsi. – Et en quoy, continua-t’il, vous fait-elle cognoistre sa mauvaise volonté ? – Que te sçaurois-je dire là dessus ? respondis-je, figure-toy qu’elle me fuit comme si j’avois quelque maladie contagieuse. Lors que j’entre en quelque lieu où elle est, elle rougit, et si elle ne peut s’en aller, elle se tourne d’un autre costé, et le jour est à naistre, où depuis qu’elle a pris cette humeur elle a seulement jetté l’œil sur moy. Que si sans y penser elle a eu le regard où j’estois, aussi tost qu’elle s’en est pris garde, elle l’a retiré si promptement qu’il est aisé à juger que cette veue luy est ennuyeuse. Mais, mon cher Belisard, à quoy te vay-je racontant toutes ces petites particularitez ? fay ton conte qu’en toutes ses actions, elle me rend tesmoignage que mon service luy est desagreable.
Belisard alors en sousriant et puis se baisant la main, et me la tendant : Mon maistre, me dit-il, consolez-vous sur ma parole, et croyez que cette fille vous ayme. – Circéne m’ayme ? luy respondis-je, il me semble qu’elle m’en donne de mauvaises cognoissances. – Seigneur, continua-t’il, asseurément Circéne vous ayme, mais il faut qu’elle soit contrainte de traiter avec vous de cette sorte, car toutes les actions desquelles vous vous plaignez en sont des preuves tres asseurées. Ces fuites, ces rougisssemens, ces changemens de place pour ne vous point voir, et bref tout ce que vous m’avez raconté ne sont que des paroles d’amour, avec lesquelles sans parler elle vous crie : Je vous ayme, Alcandre. Et pour vous monstrer que je vous die vray, quel tesmoignage vous plaist-il, seigneur, que je vous en apporte ? – O mon cher Belisard ! luy dis-je, luy jettant les bras au col, ô mon cher amy ! je voy bien que l’amitié que tu me portes te fait parler ainsi pour me donner quelque consolation. – Non, seigneur, me respondit-il froidement, je ne vous flatte point en cecy, je veux que vous n’ayez jamais assurance en ma fidelité, si je n’espere de vous apporter des preuves de sa bonne volonté la premiere fois que je parleray à elle, et laissez m’en le soucy tout entier et vous resjouyssez, et continuez seulement de vivre avec discretion auprés d’elle, sans vous offencer trop aigrement de ses actions, car croyez-moy qu’elles sont toutes contraintes et entierement à vostre advantage.
[519] Je vous ennuyerois, Hylas, si je vous redisois tous les discours que nous eusmes sur ce sujet, car je ne pouvois les finir, tant les flatteuses esperances qu’il me donnoit m’estoient agreables. En fin, devant que nous separer, il resolut de trouver les moyens de parler à elle, ce que je luy dis qu’il feroit fort aisément, feignant de l’aller visiter de la part de Florice, ainsi que dans les villes on a de coustume de faire entre les personnes qui s’ayment ; et que mesme, s’il estoit necessaire, Florice luy en donneroit la charge. – De feindre, me respondit-il, d’y aller de sa part, je le trouve fort à propos, mais qu’en effect Florice m’y envoye, il s’en faut bien garder, ny mesme faire semblant qu’elle sçache chose quelconque de vostre dessein. Car, seigneur, tenez ce secret de moy : il n’y a rien qu’une femme craigne tant que de se fier de semblable chose à une autre femme, et mesme quand elle est belle et jeune, d’autant qu’il n’y a rien si aisé que de faire naistre entr’elles du divorce, et lors Dieu sçait en quel danger sont celles qui se sont fiées de quelque chose qui leur importe ! Non, non, parmy celles qui sont bien advisées, l’amitié ny la familiarité n’ont jamais le pouvoir de les mettre en un si grand peril et si vous vous faire un bon office, luy en ait parlé, il ne faut que vous trouviez ses froideurs et ses glaçons estranges, car vous n’en devez attendre moins. – Il est vray, luy dis-je, que je ne luy ay rien caché et qu’elle luy en a parlé plusieurs fois. – Et bien ! seigneur, reprit-il, j’essayeray d’y remedier, mais croyez-moy, je vous supplie, priez Florice de ne luy en faire de semblant, et vous verrez que mon advis sera bon, et que vous en ressentirez de l’utilité bien tost.
La nuict commençoit à nous desrober le jour, et l’heure du soupper s’approchoit, lors que je sortis du jardin, beaucoup plus satisfait par les esperances que Belisard nous donnoit, que je n’estois pas quand j’y estois entré, de quoy Florice s’appercevant :
Qu’y a-t’il, me dit-elle, mon frere ? vous avez l’esprit plus content que quand vous estes sorty d’icy. – Ma sœur, luy respondis-je, parlant fort bas, mon visage est un causeur, c’est luy qui vous a dit ces nouvelles, et je vous advoue qu’elles sont vrayes, mais je vous supplie de n’en point faire de semblant, et de ne parler point à Circéne, quoy qu’elle vous die, ny de tout ce que nous avons dit, jusque à ce que je vous en advertisse. [519/520] Elle me fit signe de la teste qu’elle n’y failliroit point, et changeant de discours, nous nous mismes à table, où Amilcar arriva que nous avions à moitié souppé, qui nous dit qu’il se faisoit une grande assemblée ce soir en la maison de Dorinde, parce que le lendemain elle devoit estre mariée avec Bellimarte, chef des solduriers que le Roy Gondebaut tenoit pour sa sureté dans la ville de Lyon et que Palinice et ses freres y alloient aussitost qu’ils auroient souppé, et que le pere de Dorinde qu’il avoit trouvé dans la rue venant en nostre logis l’avoit prié d’y convier et Florice et moy ; que Circéne n’y estoit point, quoy que ses deux freres y fussent allez, parce qu’elle s’estoit trouvée mal disposée. Ces nouvelles furent cause que nous nous hastasmes de soupper pour nous y trouver puis que nous y estions priez. Et lors que j’estois prest à sortir, Belisard s’approchant de moy : Seigneur, me dit-il, si vous me voulez croire, vous n’irez point en cette assemblée, puis que Circéne n’y est pas ; car je m’en vay la trouver, et si l’on peut parler à elle, je veux que ce poinct soit l’ouverture de nostre discours. Et assurez-vous sur moy que je seray le plus trompé homme du monde, si je ne vous apporte devant que vous vous mettiez au lict des nouvelles qui vous contenteront, Je luy respondis que je le ferois, mais que de peur qu’on s’en prist garde, j’y accompagnerois Florice, et que je ne ferois qu’entrer et sortir. Belisard s’en alla donc de cette sorte au logis de Circéne, où de fortune il ne trouva auprés d’elle qu’Andronire, tout le reste s’en estant allé en cette assemblée. Elle estoit assise sur le pied de son lict, à moitié des-habillée et tenant un luth en sa main, duquel elle s’entretenoit, car entre les autres vertus de Circéne, elle joue du luth et chante en perfection. Elle estoit tellement attentive à ce qu’elle chantoit, qu’elle n’aperceut point Belisard de long temps apres qu’il fust entré dans sa chambre, et n’eust esté qu’Andronire le vid et en advertit sa maistresse, il eust longuement jouy de cette douce harmonie. Mais se levant en sursaut elle se fust mise dans un petit cabinet, pour n’estre veue ainsi des-habillée, s’il ne l’eust retenue par sa robe, et puis se jettant à genoux devant elle, il la pria et supplia tant qu’elle revint où elle estoit, commandant toutesfois à Andronire de reculer les chandelles en lieu qu’elle eust moins de honte de se voir en cet habit : Madame, luy dit Belisard, si c’est pour m’empescher de m’esblouyr, vous avez raison, car je ne vis jamais nuict où un si beau soleil esclairast. – Belisard, luy dit-elle, il faut espargner ses amies, et [520/521] mesmes en leur presence ; je ne veux pas que vous me voyez rougir de vos flatteries. Mais dites-moy, je vous supplie, qu’est-ce qui vous ameine icy, et que veut dire que vous n’estes pas en cette assemblée chez Dorinde, où tant de belles dames se doivent trouver ? – Pour respondre, dit-il, à ce que vous me demandez, il faudroit que je sceusse ce qui me doit advenir, car alors je vous diray si ce qui m’amene icy est un bon ou un mauvais demon ; mais quant à ce que vous me demandez, que veut dire que je ne suis point chez Dorinde, sçachez que vous en estes doublement la cause, car, continua-t’il tout haut, Florice ayant sceu que vous vous trouviez un peu mal, m’a commandé de venir sçavoir de vos nouvelles, et vous offrir tout le service qu’elle vous pourra rendre. – Florice, repliqua-t’elle, me fait trop de faveur d’avoir tant de soing de moy. Vous luy direz, s’il vous plaist, que cette maladie me laissera encore le moyen de m’acquitter de cette debte par quelque bon service. – O Circéne, luy dit-il alors, d’une voix plus basse, que vous estes à la bonne foy, si vous pensez que Florice sçache chose quelconque de ma venue ! – Et pourquoy, dit-elle, estes-vous menteur ? – Parce, repliqua-t’il, que trop de personnes sçauroient nos affaires, si nous disions tousjours la verité. Pensez-vous que je vueille qu’Andronire sçache le sujet de mon voyage ? Elle a trop peu de malice pour me fier en elle.
Circéne ne trouvoit pas estrange la façon de parler de Belisard, parce qu’il avoit accoustumé d’en user ainsi et envers elle et envers ses compagnes ; et toutefois elle se douta bien que je devois avoir part en ce message, car elle sçavoit que je me fiois grandement en luy, et cela fut cause qu’elle ne luy voulut plus demander le sujet qui l’amenoit. Mais luy reprenant la parole : Je ne vis jamais, continua-t’il, une si peu curieuse personne que vous estes. Pourquoy, puis que je vous ay dit que ce n’estoit pas Florice qui me conduisoit icy, ne me demandez-vous qui c’est ? Circéne alors en souriant : Et moy, luy dit-elle, je ne vis jamais une personne si prodigue de ses screts que Belisard qui ne se contente pas de les dire à ceux qui les luy demandent, mais qui les veut mesme faire sçavoir par force à ceux qui n’en ont point de curiosité. – Vous devez cognoistre par là, respondit-il, que le blasme que l’on donne aux femmes peut bien estre deu à quelques hommes. – Et de quel blasme parlez-vous ? dit Circéne en sousriant. – De celuy duquel on les accuse, dit Belisard, de ne sçavoir [521/522] rien taire. – Il est vray, reprit alors Circéne, que les hommes nous en blasment. Et toutesfois il me semble qu’avec raison on les en pourroit mieux accuser, pour le moins plusieurs que je cognois. Que si c’est un vice naturel aux femmes, il faut que la nature ait failly en moy, car je vous jure, Belisard, que, quand on m’a prié de ne point dire quelque chose, je l’oublie de sorte que je ne m’en souviens plus si l’on ne m’en parle. – Estes-vous de cette humeur, adjousta Belisard, en tout ? – En tout, repliqua-t’elle, pour peu qu’il soit d’importance. – Je veux esprouver, dit alors Belisard, si vous estes veritable, car je vous veux confier un secret que je ne voudrois pas qui fust sceu pour la moitié de ma vie. – Et pourquoy, adjousta Circéne, me le voulez-vous dire ? – Pour deux raison, dit-il, pour sçavoir s’il y a une femme qui se sçache taire, et l’autre, pour vous faire voir combien Belisard est vostre serviteur, puis qu’il vous remet entre les mains un secret avec lequel vous le pourrez ruyner quand vous voudrez. – Vrayement, respondit-elle, je veux bien sçavoir ce que vous me voulez dire, pour les deux considerations que vous me representez, mais prenez garde de n’en avoir parlé à quelqu’autre, ou que vous n’en parliez apres, de peur que si celles à qui vous l’avez dit, ou à qui vous le direz, le publioient, je ne fusse accusée de leur faute. – Non non, respondit Belisard, je m’assure que quand je le vous auray dit, vous perdrez cette doute. – Si cela est, reprit Circéne en sousriant, je seray bien ayse de l’entendre, tout pour vous montrer quelle je suis, que pour sçavoir quel vous estes envers moy.
– Oyez donc, dit Belisard, ce que je vous veux dire. Vous sçavez bien, continua-t’il, qu’il n’ya rien au monde que j’ayme ny que j’honore comme Alcandre, vous sçavez le long temps que j’ay esté nourry auprés de sa personne, je pense que vous avez recognu l’estat qu’il fait de moy, et combien il se fie à fidelité. Or à ce coup je vous veux remettre un secret qu’il m’a confié, et qu’il aymeroit mieux mourir que d’estre sceu. Sçachez donc, belle Circéne, qu’en me parlant de choses d’importance, il m’a juré sur sa vie et rejuré cent et centfois par tout ce qu’il a de plus cher, et je sçay assurément qu’il disoit vray. Il m’a juré, dis-je, qu’il aymoit de telle sorte la belle Circéne, et estoit tellement bon serviteur qu’il n’y eut jamais une affection qui esgalast la sienne, et si cette affection venoit à vous estre des-agreable, il ne recourroit jamais à autre remede qu’à la mort. [522/523] Et parce que Belisard se teut à ce dernier mot, Circéne en sousriant reprit : Est-ce là tout le secret de Belisard, que vous me voulez dire ? – Et ne vous semble-t’il pas de tres-grande importance, dit Belisard, puis qu’il y va du contentement et de la vie d’un tel chevalier ? Car sçachez, Circéne, que depuis qu’il vous a veue, il ne songe en luy-mesme ny ne discourt avec moy jamais que de vous. Toutes ses pensées sont de rechercher les moyens de vous servir tous ses discours à vous louer et estimer, et tous ses desirs en l’honneur de vos bonnes graces. – Vrayment, adjousta Circéne, voicy une façon de descouvrir l’affection d’une personne qui n’est pas commune. – Je vous supplie, reprit-il, ma belle dame, de vouloir bien tenir secret ce que je vous dis. – Je le vous promets, adjousta-t’elle, et de telle façon que je ne veux pas mesme que Circéne en sçache ny en croye jamais rien. – O ce n’est pas, dit-il alors, ce que je demande de vous, car au contraire, je veux que Circéne le sçache et le croye comme il est tres-veritable ; mais j’entends que vous n’en parliez point ny à Palinice, ny à Clorian. – Non non, respondit-elle, ny Palinice, ny Clorian, ny Circéne n’en sçauront rien : asseurez-vous-en sur moy. Et ne vous souvenez-vous pas de ce que je vous ay dit au commencement de nostre discours, que quand l’on me disoit quelque chose qu’il falloit taire, je l’oubliois entierement ? Croiez, Belisard, que j’en feray de mesme du secret que vous me venez de dire, car je ne m’en souviendray jamais plus. – Mauvaise fille, repiqua Belisard, pensez-vous que je vous aye dit quelque chose pour vous le faire oublier ? Est-ce ainsi que vous mesprisez ce que je vous dis, et qui importe à un chevalier de tant de merite, et à une dame la plus belle du monde ? – Ce que vous me dites reprit alors froidement Circéne, n’a nulle des conditions que vous proposez, et c’est la dame de laquelle vous parlez est bonne, mais non pas belle, et le chevalier auquel vous dites que cette affaire touche, ne le pense pas comme vous, et ce secret que vous figurez tel, est desja sceu de tous ceux qui l’ont, voulu entendre. – Je suis bien-aise, respondit Belisard, puisque contre votre conscience vous voulez nier ce que je dis, que vous advouez au moins que chacun les advoue, et que , pour la beauté que vous dites n’estre point en Circéne, tous les yeux qui la voyent vous desmentent, que pour l’affection que vous mettez en doute d’Alcandre, toutes ses actions vous en rendent tesmoignage, et qu’en fin, pour le secret que vous dites n’estre [523/524] plus tel, le temps qui descouvre la verité vous fasse cognoistre que personne n’en a jamais ouy parler que Circéne, Alcandre et Belisard. – Ah ! menteur, reprit-elle incontinent, et Florice ne m’en a-t’elle pas diverse fois parlé ? – Florice peut bien vous avoir parlé de ce qu’elle a pensé, mais non pas qu’Alcandre luy en ait dit quelque chose. – Et Clorian et Palinice, continua-t’elle, ne s’en sont-ils pas aperceus ? – Et comment, adjousta Belisard, sçavez-vous qu’ils s’en soient aperceus ? – Comme je le sçay ? respondit-elle, et l’un et l’autre me l’ont dit, et avec quelles reproches ! Croyez, Belisard, que depuis qu’ils en ont eu opinion, je n’ay pas esté sans exercice.
Alors Belisard en sousriant : Voulez-vous, luy dit-il, belle Circéne, que je vous confesse la verité ? Tout ce que je vous ay dit d’Alcandre est si vray, que le Ciel et la terre ne le sont point davantage, et je veux estre rayé du nombre des vivans s’il ne vous aime, ou plustost s’il ne vous adore. Mais le sujet qui m’a fait venir en ce lieu, et celuy de tout le discours que jusqu’icy je vous ay fait, n’a esté que pour sçavoir ce que vous venez de me dire de Palinice et de Clorian. Car et Alcandre et moy nous ne pouvions imaginer pourquoy vous le traitiez si cruellement, veu l’extreme affection qu’il vous porte, et la discretion avec laquelle il vous aime, nous semblant qu’il n’y avoit pas grande apparance qu’il fust rudoyé de la sorte, veu son merite et le desirs qu’il avoit de vous faire service. Maintenant je voy bien qu’il n’y a point eu de mauvaise volonté de vostre costé, mais que l’importunité seul de Clorian et de sa sœur en ont esté la cause. Vous plaist-il pas que nous le croyons ainsi, et que pour la satisfaction, ou plustost pour la conversation de la vie de mon cher maistre, je le luy fasse entendre de cette façon ?
Et parce qu’elle ne parloit point, et qu’au lieu de luy respondre, elle s’estoit levée, et se promenoit doucement par la chambre, il continua de cette sorte : Je me suis plusieurs fois estonné du bon-heur de quelques personnes et du mal-heur des autres, car j’en ay veu qui avoient plus de bien qu’ils ne meritoient, et d’autres qui ne pouvoient obtenir ceux desquels chacun les jugeoit dignes. En cette occasion, nous pouvons bien justement faire cette mesme consideration, car avec quelle justice l’honneur de vos bonnes graces peut-il estre desnié à Alcandre, ou avec quelle raison Clorian aura-t’il l’absolu pouvoir qu’il emporte sur vostre volonté, puis que, qui considerera le merite de l’un et l’autre, [524/525] sera bien privé de jugement, s’il ne prefere, en tout Alcandre ; mais quand il n’y auroit que cette seule consideration, elle vous devroit emporter de son costé, Clorian use d’un si grand empire sur vous, qu’il semble que vous luy soyez de beaucoup inferieure, et au contraire Alcandre vous respecte et honore de telle façon que si vous estiez sa déesse, il ne sçauroit vous servir ny vous reverer davantage. Et c’est une chose qui est difficile d’estre creue, et que toutesfois nous voyons estre vraye : vous usez de toute sorte de soubmission envers qui vous foule aux pieds, et de toute espece de cruauté et de mespris envers qui vous adore. – Ha ! reprit Circéne, de mespris ? vous vous trompez, j’estime Alcandre comme je dois, et comme son merite y oblige tous ceux qui le cognoissent. – Je vous assure, reprit alors Belisard, que vous le gratifiez fort d’en faire l’estime que font tous ceux qui le cognoissent. N’estes-vous pas obligée à quelque chose davantage, puis qu’il ne vit ny ne veut vivre que pour vous servir. – Et que voulez-vous, respondit-elle en sousriant, que je fasse de plus ? – Que sert-il que je vous le die ? adjousta-t’il. Et à ce mot, ils s’approcherent de la table, où sans songer à ce qu’il faisoit, il prit une plume, et alors tirant quelques lignes sur du papier sans dessein : Pourquoy, continua-t’il, vous le diray-je, puis qu’aussi bien vous n’en ferez rien ? – Peut-estre, reprit-elle en sousriant, vous avez deviné, mais peut-estre aussi vous trompez-vous. – Respondez-moy premierement à une chose que je vous veux demander : aimez-vous, ou voulez-vous mal à Alcandre ? – Vrayment, respondit-elle en sousriant, vous me faites une gracieuse demande, et pourquoy hayrois-je une personne qui a tant de merite, et qui ne m’en donne point d’occasion ? – Si vous dites vray, reprit-il, pourquoy le traittez-vous avec tant de rigueur ? – Je ne sçay, dit-elle, ce que vous appelez rigueur. – Quand vous le voyez, repliqua Belisard, vous vous tournez de l’autre costé ; s’il s’approche, vous le fuyez ; s’il parle à vous, vous ne luy respondez point, ou si vous y estes forcée, c’est tousjours avec des demy-mots et bref toutes ces autres façons mesprisantes et dont vous n’usez qu’envers luy. – Veux-tu, Belisard, luy dit-elle en luy mettant une main sur l’espaule, que je te parle franchement ? je n’ay jamais creu que toy ny ton maistre eussiez si peu d’esprit que vous en avez. Dy moy, je te supplie, si je traitte differemment Alcandre de tout autre, n’est-ce pas signe que je le tiens en autre rang que tous les autres ? [525/526] Va, Belisard, et apprends que les femmes sont bien souvent contraintes de faire semblant de ne voir point ce qu’elles voyent, et de voir au contraire ce qu’elles ne voyent point. – O dieux ! dit-il, Circéne, que je remercie de bon cœur mon ignorance, puis que vous m’avez appris la seule chose que je desirois sçavoir ! et que cette leçon apportera de contentement à la personne du monde qui est maintenant la plus affligée, et que je rendray la plus contente bien-tost et la plus heureuse.
Et à ce mot, reprenant la plume, il se remit à brouiller le papier, cependant que Circéne reprenant son promenoir le long de la chambre, pour ne donner soupçon à Andronire de leur si long discours, de temps en temps venoit voir ce qu’il escrivoit, car Belisard, de qui l’esprit est excellent, avoit la reputation de mettre aussi bien par escrit que personne qui fust en la Cour. Et cela fut cause qu’elle luy dit fort haut : Que n’escrivez-vous quelque chose de bon et non pas brouiller seulement mon papier ? – Si vous voulez, dit-il, approuver ce que j’escriray, vous verrez que je ne seray point paresseux à vous obeir. – Si c’est chose qui se doive, respondit-elle, je le feray. – O, reprit-il, Circéne ! que j’estimerois ce soir heureux si vous le vouliez faire. – Je le feray sans doute, repliqua-t’elle, pourveu qu’il se puisse ; mais qu’est-ce que vous voulez escrire ? – Vous le verrez, dit-il, et ne me croyez jamais pour vostre serviteur, si j’y mets chose qu’avec raison vous puissiez desadvouer.
Et lors, prenant un autre papier, il escrivit ce billet.

Cependant qu’il l’escrivoit, elle l’alloit lisant, et sousrioit en elle-mesme. Or bien ! dit alors Belisard, tenez-moy la parole que vous m’avez donnée ; faites à cette heure ce que vous m’avez promis. – Et quelle promesse, dit-elle, vous ay-je faite ? – Vous m’avez assuré, respondit-il, que si c’estoit chose que vous deus-[526/527]siez, vous approuveriez ce que j’escrirois. Ay-je rien escrit qui ne soit vray, et que vous ne deviez advouer ? – Je ne sçay, reprit-elle, à qui cet escrit s’adresse, ny au nom de qui vous l’escrivez. – Vous pouvez aisément juger, dit-il, qu’il est raisonnable, pour me rendre croyable, que j’emporte ce tesmoignage au plus fidele serviteur que vous aurez jamais. – Mais quand tout cela seroit, respondit-elle, que voulez-vous que j’y fasse ? – Je veux, repliqua-t’il, que vous approuviez ce que j’ay escrit. – Ce n’est pas assez, adjousta-t’il, il faut que vous y mettiez vostre nom. – Et puis alors, continua-t’il, vous aurez satisfait à vostre promesse et je seray content. – Mais ce n’est pas ce que je demande, respondit-elle, je veux sçavoir que deviendra ce billet, et à quoy se resoudra tout ce mystere ? – Il ne faut pas, dit-il alors, en luy mettant la plume en la main, et la luy portant sur le papier, il ne faut pas estre si curieuse ; faites seulement ce que vous avez promis, et puis nous en parlerons davantage.
Et lors presque par force il luy fit escrire Circéne et parce qu’incontinent il retira le papier : Non non, dit-elle, je le veux ravoir, car je n’ay pas promis de le vous laisser, mais seulement de l’approuver. – Il est vray, respondit-il, mais aussi ne vous ay-je pas promis de vous le rendre ; de sorte que je ne manque non plus à ma parole que vous à la vostre. – Et bien ! dit-il, vous l’aurez à condition que ce sera des mains d’Alcandre.
Avec semblables discours, parce qu’il se faisoit tard, il luy donna la bonsoir, et elle, voyant qu’il emportoit, s’approchant de luy : J’ai appris, dit-elle, en sousriant, qu’il faut donner ce que l’on ne peut vendre ; dites pour le moins à Alcandre de quelle façon vous m’avez trompée. – Ce ne sera pas, luy dit-il en s’en allant, ce que je luy diray, mais ouy bien qu’il est plus heureux qu’il n’a jamais pensé estre. Et sans attendre autre responce, il me vint trouver, et parce que j’estois seul dans le logis, je m’estois amusé à escrire du sujet qui me touchoit le plus, et à l’heure mesme que Belisard revint, il trouva que je finissois ces vers. [527/528]

Au mesme temps que Belisard entra, j’achevois d’escrire ces vers, et parce qu’ordinairement je les luy communiquois, devant que luy demander s’il avoit veu Circéne, je les luy fis lire, afin d’en sçavoir son advis, d’autant que, comme je vous ay dit, il avoit un tres-bon esprit, et jugeoit fort bien de semblables choses. Mais à ce coup, à peine se pust-il donner le loisir de les lire, que les jettant sur la table : Ces vers, me dit-il, ne sont non plus de saison que les docteurs en temps de guerre. – Qu’est-ce, Belisard, adjoutay-je, que tu veux dire ? – Je veux dire, reprit-il, en se mettant les mains sur les costez, qu’il n’y a qu’un Belisard au monde pour remettre une affaire qui estoit desesperée. Qu’est-ce que vous parlez de mespris, de rigueur et de cruauté ? rien qu’amour, rien que faveurs.
Jettant la plume alors que j’avois encore entre mes mains, je courus l’embrasser en luy disant : Te mocques-tu point, Belisard ? est-il possible que Circéne t’ait rendu quelque tesmoignage de bonne volonté pour moy ? – Je m’assure que vous estes tellement preoccupé, me dit-il, de l’opinion que vous avez, que mal-[528/529]aisément croirez-vous à mes paroles. Mais oyez bien ce que je vay vous dire, et puis demandez m’en quelque assurance, qu’avec raison vous puissiez dés à cette heure pretendre, et je m’assure que je vous la donneray. Je vous dis donc que non seulement Circéne a agreable d’estre servie de vous, mais de plus qu’elle vous aime, et que voulez-vous pour preuve de ce que je dis ? – Ah ! Belisard, m’escray-je, transporté de trop de contentement, dois-je croire une si bonne nouvelle ? – Je sçavois bien, reprit-il, que vous seriez incredule, et c’est pourquoy dés le commencement je vous ay offert de vous en donner une telle assurance, que vous pussiez adjouter foy à ce que je dirois ; or pensez laquelle seroit assez forte pour faire que vous me voulussiez, donner creance. – Jures-en, luy dis-je, par l’amitié que tu me portes. – Celle-là, me dit-il, en effet est tres-grande, et je ne pense pas en pouvoir trouver une qui le soit davantage ; mais d’autant qu’il faut mesme que vous vous serviez de la foy que vous avez en moy, je veux vous en donner une où cette creance que vous avez en moy n’ait point de lieu. – Jure-le, luy dis-je, par l’amitié que je porte à Circéne. – les sermens, respondit-il, ne sont que des paroles, et je veux vous donner quelque preuve que vous voyiez et que touchiez. – M’apportes-tu, repris-je, pour marque de ce que tu dis quelque chose que j’aye veu dessus elle ou entre ses mains ? – Plus, repliqua-t’il. – Je te conjure, luy dis-je alors, saisi d’impatience, ne me retiens plus long temps privé du bien que tu me veux faire. – Vous contenterez-vous, repliqua-t’il, et me croirez-vous une autrefois, si maintenant je vous fais voir par escrit que ce que je vous ay dit est vray ? – O dieux ! m’escriay-je, j’ay peur que tes promesses soient trop grandes. – Or je veux montrer, reprit-il, que mes effects sont encore plus grands que mes promesses, car non seulement vous le verrez par escrit, mais que c’est à vous à qui elle l’escrit.
Et lors me donnant le billet : Voyez-vous, continua-t’il, comme ce contact d’amour duquel j’ay esté le secretaire, a esté signé et approuvé de sa belle main, et jugez que signifie cette Circéne qu’elle vous envoye, sinon qu’elle vous donne celle-cy, en attendant qu’elle vous fasse possesseur de l’autre.
Vous pourrois-je dire, Hylas, ny mon ayse ny mon ravissement ? Je baisay cent fois ce beau nom de Circéne, et me le joignant contre le cœur, il me sembloit que j’en recevois une consolation qui ne se peut imaginer. Et parce en fin que je m’estonnois [529/530] comme il estoit possible qu’il eust pu obtenir cette declaration d’elle, puis que ne luy ayant jamais escrit, il me sembloit que ce n’estoit pas bien à elle de commencer, il me raconta d’un bout à l’autre tous les discours qu’ils avoient eus ensemble, sans en oublier une moindre parole. Je l’escoutois si attentivement et avec un si grand plaisir que je n’eusse jamais voulu que ce discours eust finy : Masi en fin, me dit-il, c’est la verité, mon maistre, que cette fille n’a pas seulement le corps fort beau, mais l’un des plus rares esprits que l’on puisse imaginer, et que sa jeunesse, encore que bien grande, ne luy oste point la prudence et la sagesse. Et croyez-moy que vous estes obligé de l’aymer, non seulement pour cette extreme beauté que vous voyez en elle, mais plus encore pour la bonne volonté qu’elle vous porte. Car, outre ce que vous en voyez par escrit, je vous asseure que ses discours me l’ont bien mieux tesmoigné et que toutes ces actions qui vous ont mis en peine n’ont esté que des contraintes qu’elle faites pour n’oser pas faire autrement ; mais que ne devez-vous pas attendre, puis que dés la premiere fois j’ay obtenu plus que vous n’eussiez osé esperer ?
Nostre discours n’eust pas si tost finy, car je ne me pouvois lasser de luy faire dire et redire cent fois une mesme chose, n’eust esté que Florice et Amilcar revindrent de cette assemblée où tous deux avoient eu du desplaisir et du contentement, car Lucindor et Cerinte s’y estoient trouvez, qui n’avoient gueres abandonné Florice. Sileine aussi avoit tenu bonne compagnie à Palinice, de sorte qu’Amilcar ne pust guere parler à elle sans compagnie. Soudain que je les vis, rompant nostre propos, Belisard et moy, je les pris tous deux par la main, et les retirant à part : Or sus, leur dis-je, je veux participer à vos contentements, afin que ce soir qui a esté si mal employé pour moy, ne se passe point, au moins entierement, sans me donner quelque plaisir.
Ils sousrirent tous deux, et Florice prenant la parole : Quant à moy, dit-elle, j’ay veu Lucindor et Cerinte. – Et moy, continua Amilcar, pour mon bon-heur, Palinice, et pour mon malheur, Sileine auprés d’elle. – Or, reprit Florice, je ne vous puis dire rien de nouveau, sinon que je suis la fille du monde la plus persecutée de leurs importunitez, ou plustost de leurs jalousies ; car figurez-vous que je ne puis parler à l’un, que, si à mesme temps, je n’ay l’œil sur l’autre, il n’en demeure mal satisfait. Et bien souvent avec toute la peine que je m’en donne, je les desoblige [530/531] tous deux, car celuy à qui je parle est marry que je ne le reagrde pas, et celuy que je regarde, que ce n’est luy à qui je parle, et ce soir j’ay eu peur deux ou trois fois qu’ils ne vinssent à quelques paroles picquantes, car j’en ay veu le discours ouvert diverses fois, si promptement je ne l’eusse rompu. – Pour moy, ma sœur, luy dis-je, si vous avez à en aymer l’un des deux, je vous supplie que ce soit Lucindor, car il est frere de Circéne, et luy dites, pour l’obliger, que c’est moy qui tiens son party auprés de vous. – Tant s’en faut, adjousta Amilcar en sousriant, je vous conjure, ma sœur, d’aymer Cerinte, parce qu’il est frere de Palinice, et lui faites bien entendre que je vous en ay suppliée. – Mes freres, mes amis, interrompit Florice, pour l’amour de vous, dit-elle, se tournant vers Alcandre, je ne feray point d’estat du frere de Circéne, et pour l’amour de moy je ne me soucieray, ny de Lucindor, ny de Cerinte.
Nous ne pusmes nous empescher de rire de ceste declaration, et apres, reprenant la parole : Aymez-les, luy dis-je, ou ne les aymez point, c’est le moindre de mes soucis, pourveu que vous fassiez semblant de ce que je dis. Mais vous, Amilcar, continuay-je, quelle fortune avez vous eue ? – Fort gracieuse, respondit-il, pour le commencement, mais la fin n’a pas esté telle. Lors que nous sommes arrivez dans l’assemblée, Sileine n’y estoit point encore, si bien que trouvant la place libre, pour n’estre mauvais mesnager de ce temps, je luy ay dit : Que j’eusse voulu de mal à mon frere si je m’en fusse allé avec luy, comme il m’a voulu emmener. – Peut-estre, me respondit-elle, y eussiez-vous eu plus de contentement que vous n’en recevrez pas icy. – A la verité, repliquay-je, il n’y a personne qui le puisse deviner plus content et le plus malheureux homme du monde, et seulement avec une parole. – Si cela est, adjousta-t’elle, il faut que vous mettiez vostre heur ou vostre malheur en peu de chose. – Non pas cela, respondis-je, mais c’est que je fais tant d’estat de vous que les moindres choses qui viennent de vous me semblent tres-grandes. – Prenez garde, me dit-elle, Amilcar, que ce qui vous semble tel, en effect ne le soit pas. – Pleust à Dieu, repliquay-je, belle Palinice, qu’il vous plust de m’en faire juger avec l’experience. – Et que faudroit-il que je fisse, dit-elle, pour vous rendre aussi sçavant ? – Je voudrois, continuay-je, que vous disiez [531/532] seulement : J’ayme Amilcar. – Ce mot ne sied pas bien, dit-elle, en la bouche d’une honneste femme. – Dites donc, repris-je : L’amour qu’Amilcar me porte m’est agreable. – comment, reprit-elle en sousriant, voulez-vous que je le die, si mesme je ne croy pas qu’il soit vray ? – O Dieu ! me suis-je escrié, vous ne le croyez pas ? Ah ! mescognoissante Palinice, et que faut-il donc que je fasse pour vous en donner la creance ? – Si ceste creance, a-t’elle respondu, vous pouvoit estre utile, il en faudroit chercher les moyens, mais autrement je ne le vous conseille pas. – Et lors que vous ne pourrez plus l’ignorer, ay-je repliqué, l’aurez-vous agreable ? – De l’advenir, a-t’elle dit, les jugemens sont fort incertains, et mal-aisément en peut-on asseurer quelque chose. – A quoy faut-il donc que je recoure ? ay-je respondu. Et en mesme temps Sileine est arrivé, qui nous a empesché de continuer nostre discours, sinon qu’elle m’a dit fort bas : A l’essai. Et depuis, de tout le soir, nous n’avons pu parler sans ce fascheux tesmoin. Nous nous allions entretenant de la sorte et j’apprenois ainsi leurs fortunes, sans que je leur fisse part des miennes, non pas que je ne voulusse bien qu’ils les sceussent, mais je craignois de deplaire à Circéne que je voyois estre si contrainte pour l’authorité que Palinice et Clorian s’y estoient usurpée. Et d’autant qu’il estoit tard, nous nous retirasmes pour nous reposer ; mais j’entretins encore Belisard dans ma chambre si long-temps, en luy faisant raconter cent fois une mesme chose, que le jour commença de paroistre, devant que je luy voulusse permettre de se retirer. Le soleil nous pressant, nous prismes resolution qu’il falloit gaigner auprés de Circéne la fille qui la servoit, estant presque impossible de se defendre de ses yeux, et puis que Belisard avoit desja esté si heureux en sa premiere entreprise, je luy remis de telle sorte la conduite de toutes choses que je m’en reposay entierement sur luy.
Ce discours seroit trop long, Hylas, si je voulois vous raconter par le menu tout ce que nous fismes, tant mon frere et moy, que ces autres quatre chevaliers. Tant y a que Belisard, travailla si bien qu’il s’acquit non seulement un grand credit envers Circéne, mais aussi se rendit entierement sienne Andronire. Mais, par malheur, je fus contraint en ce temps-là de faire un voyage pour le bien de nostre maison dans le pays des Veragrois, ou ma mere, quoy que je sceusse faire, voulut que j’allasse fort promptement. Dieu sçait si ce depart me fut sensible, et si je n’eusse pas volon-[532/533]tiers donné cette charge à Amilcar ! Mais d’autant que j’estois l’aisné et par conséquent celuy à qui le bien arrivoit, il fallut se resoudre à ce fascheux depart. Je me souviens que Belisard porta à Circéne ces vers de ma part.

V

VI

VII

VIII

IX

X

XI